تشوروز

1. بنضيف الماء والزبدة والسكر والملح بطنجرة صغيرة وبنحطها على حرارة متوسطة لحد ما يغلي الخليط. 2. بس يغلي بنوطي النار وبنضيف الطحين وبنضل نحرك لحد ما يصير عنا مزيج متماسك وناعم. 3. بننقل المزيج لصحن عميق وبنخليه يبرد عشان ما يستوي البيض لما نضيفه بسبب الحرارة. 4. بنضيف البيض والفانيلا وبنخلط بالخلاط الكهربائي او بإيدنا. 5. راح تفصل العجينة اول ما نخلطها بس هاد اشي طبيعي، بنضل نخلط لحد ما تمتزج المكونات منيح ويصير عنا عجينة طرية وناعمة. 6. بننقل العجينة لكيس حلواني بفوهة على شكل نجمة (الشكل مهم عشان يعطينا الطبقة الخارجية المقرمشة) 7. بنحمي الزيت على درجة ١٨٢ وبنطلع العجينة مباشرة على الزيت بشكل طولي وبنقص الطرف او بنحط الاشكال بصينية وبنجمدهم بالفريزر وبنقليهم. 8. بنقليهم لحد ما يصير لونهم بني ذهبي وبننقلهم على محارم المطبخ عشان ينشفوا من الزيت (تقريباً ٣٠ ثانية) 9. بعدين يننقلهم على خليط السكر والقرفة وبنغلفهم بالخليط منيح. 10. بيتقدموا ساخنين او دافيين.

- حبيت اغير واعملها اشكال بس التشوروز اصلاً بتنعمل بالطول. - ما الها اي علاقة بأصابع زينب لا بالشكل ولا بالمكونات. - ممكن تغمسوها بشوكلاتة او لوتس او نوتيلا او كراميل بس انا بحبها لحالها من دون اضافات. - لما تنعمل بالطول بتقدروا تنزلوا العجينة مباشرة بالزيت من دون تجميدهم بس انا فكرت بهالطريقة عشان اسهل الموضوع على حالي وعليكم من دون عجقة.

- ٢٥٠ مل (كوب) ماء - ٥٥ جرام (١/٤ كوب) زبدة - ١٣ جرام (ملعقة كبيرة) سكر - ١/٢ ملعقة صغيرة ملح - ١٤٠ جرام (كوب) طحين متعدد الاستعمالات - ٣ بيض - ١ ملعقة صغيرة فانيلا - زيت نباتي للقلي للتغليف: - ١/٢ كوب سكر - ملعقة صغيرة قرفة بنخلطهم مع بعض بصحن واسع شوي.