كاري الدجاج التايلندي

- الأصل انه ينضاف معجون الكاري الأحمر التايلندي (Thai red curry paste) بتلاقوه بالسوبرماكتس الكبار، بس انا حبيت اعطيكم نكهة مشابهة واستبدله بمكونات متوفرة بالبيت. - هاي الوصفة ممتازة للايام الي بتكونوا مشغولين فيها وبدكم اشي سهل وسريع. - بتقدروا تحتفظوا فيها بالفريزر لمدة ٣ اشهر وبالثلاجة لمدة ٣ ايام. - إذا حابين نكهة تايلندية أقرب، ممكن إضافة ملعقة صغيرة صوص سمك (fish sauce) بدل جزء من الملح - ممكن استبدال الصدور بالفخذ بدون عظم لطراوة أكثر (اختياري) - جربوا النكهة وزيدوا من المنكهات على كيفكم، مافي قوانين صارمة بالطبخ

1. بطنجرة بنضيف الزيت والكاري والكمون والكزبرة والكركم وبنقلبهم دقيقة. (لما نقلي البهارات بنبني نكهات اغنى واعمق وبناخد اكبر نكهة ممكنة منهم) 2. بنضيف الدجاج وبنقليه على حرارة متوسطة لعالية لحد ما يستوي ويتحمر شوي (ما نكتر تحريك عشان يتحمر). 3. بنضيف البصل وبنرش عليه ملح وبنقلبه لحد ما يذبل (الملح بيساعد البصل انه يطلع الرطوبة وينطبخ بشكل اسرع) 4. بنضيف الثوم والزنجبيل وبرش الليمون والفلفل الحار وبنقلبهم دقيقة. 5. بنضيف الجزر والفلفل الأحمر وبنقلبهم لمدة دقيقتين. 6. بندير حليب جوز الهند عالخليط وبنحرك منيح و بنوطي النار شوي (لمنع فصل الحليب). 7. بنضيف معجون البندورة ومكعب مرق الدجاج وملح وفلفل اسود وابيض وسكر بني وبنخليه على حرارة متوسطة ل٥ دقايق يمتزجوا النكهات مع بعض. 8. اخر اشي بنضيف عصير الليمون، وبيتقدم مع رز او كينوا