كريب البرتقال

اذا ما بتحبوا البرتقال او بدكم وصفة بيرفيكت للكريب العادي امشوا عالمقادير المكتوبة (من دون برش البرتقال) ومش راح تستخدموا اي طريقة تانية ٣/٤ كوب حليب (١٨٠ مل) ١/٢ كوب ماء بارد (١٢٠ مل) ٢ بيض ٣ ملعقة كبيرة زبدة غير مملحة (+زيادة لدهن المقلاة) ١ ملعقة صغيرة سكر ١/٢ ملعقة صغيرة برش برتقال ١/٤ ملعقة صغيرة ملح ١ كوب طحين متعدد الاستعمالات (١٢٠ جرام) طريقة عجينة الكريب: ١. بنخلط كل المكونات ما عدا الطحين بالخلاط او بالإيد. ٢. بنضيف الطحين وبنخلط. (اذا بنخلط بالإيد يفضل نخل الطحين) ٣. بنخلي الخليط يرتاح بحرارة الغرفة لمدة ٢٠ دقيقة او بس يصير عليه فقاعات صغيرة. مهم جداً نخليه يرتاح (بنعمل الصلصة عبين ما الخليط يرتاح)

١. بندهن مقلاة بالزبدة وبنحميها على حرارة متوسطة. ٢. بنضيف تقريباً ربع كوب من الخليط وبنحرك المقلاة بشكل دائري حتى تصير العجينة رفيعة. ٣. بنخليها دقيقة او دقيقتين لحد ما تصير ذهبية. ٤. بنقلبها وبس تجهز بنطويها على شكل مثلث وبنخليها بصحن على جنب. ٥. بنعيد نفس الخطوات ببقية العجين مع دهن المقلاة بالزبدة بين كل كريب. (بتقدروا تحتفظوا بباقي الخليط *مغطى* بالثلاجة لمدة يومين)

مقادير الصوص: ٢ ملعقة صغيرة برش برتقال ١ كوب عصير برتقال فريش (٢٦٠ مل) ١/٢ كوب زبدة غير مملحة (١٠٠ جرام) ١/٤ كوب سكر (١٠٠ جرام) *اذا كان البرتقال حلو قللوا من كمية السكر الطريقة: 1. بنضيف كل المكونات بمقلاة او طنجرة على حرارة متوسطة وبنخلي المزيج يغلي مع التحريك احياناً. 2. بس يغلي بنوطي الحرارة على اوطى اشي وبنطفيه بعد ١٥ دقيقة او لحد ما يتكثف ويصير صلصة.

1. بس نجهز كل الكريب بنضيفهم على صلصة البرتقال وبنخليهم على نار هادية لمدة ٣ دقائق من دون تحريك. 2. بنقدمهم مباشرة مع اضافة كريمة او اي نوع فواكه بتحبوه. (اختياري)