براونيز صحية بدبس التمر (خالية من السكر الابيض والجلوتين)

براونيز فادجي بدبس التمر وبدون سكر أبيض وبدون موز وخالي من الجلوتين واهم اشي انه جد بتشششهي ما بتفرق عن البراونيز العادي القالب: 20 × 20 سم الكمية: 12–16 قطعة المقادير: -2 بيض كبير بحرارة الغرفة -½ كوب (١٠٠ غ) دبس تمر -100 غ شوكولاتة دارك 70% -60 غ زبدة غير مملحة -⅓ كوب (30 غ) كاكاو بودرة غير محلى -½ كوب (50 غ) طحين شوفان او اي طحين بتحبوه -1 كوب (حوالي 120 غ) كوسا مبشورة ناعم جدًا -1 ملعقة صغيرة فانيلا -½ ملعقة صغيرة ملح -½ ملعقة صغيرة إسبريسو بودرة، اختياري -60 غ شوكولاتة دارك مفرومة لقطع صغيرة او تشوكليت تشيبس الكوسا مهمة جدًا: 1.بنبشر الكوسا ناعم جدًا وبنعصرها منيح. 2.المطلوب نشيل تقريبًا نص إلى ثلثين كمية السوائل، بس ما نعصرها لدرجة تصير ناشفة تمامًا. 3.الرطوبة اللي بتضل بالكوسا هي اللي بتساعدنا نحصل على قوام فادجي وغني. طريقة التحضير: 1.بنذوب الـشوكولاتة مع الزبدة وبنتركهم يبردوا شوي. ما بدنا الخليط يكون ساخن جدًا لما نضيفه عالبيض. 2.بنعمل أهم خطوة عشان نحصل على الطبقة اللامعة والمشققة: بنحط البيض ودبس التمر بصحن، وبنخفقهم بالخلاط الكهربائي على سرعة عالية لمدة 3–4 دقايق، لحد ما يفتح لون الخليط ويصير أثخن وفيه فقاعات صغيرة ويزيد حجمه. 3.بعدين بنضيف الفانيلا وخليط الشوكولاتة والزبدة المذوب بالتدريج على خليط البيض وإحنا بنخلط على سرعة منخفضة، 4.بننخل الكاكاو، طحين الشوفان، الملح والإسبريسو باودر، وبنضيفهم على الخليط وبنقلب بلطف ما بدنا نخفق الخليط بهاي المرحلة. 5.بنضيف الكوسا المعصورة وبنقلبها، واذا بتحبوا تضيفوا كمان شوكلاتة مفرومة او تشوكليت تشيبس جوا الخليط وبنقلب لحد ما تتوزع. 6.بنحط بالقالب ورق زبدة وبنوزع الخليط فيه بالتساوي. 7.بندخلها فرن محمى مسبقًا على حرارة 170 لمدة 19–23 دقيقة، وبنبلش نفحصها من الدقيقة 19. 8.بدنا الأطراف تكون ماسكة، والوجه لامع ومشقق، والوسط لسه طري وبيهتز شوي. 9.لما ندخل عود خشبي على الجناب لازم يطلع عليه فتات رطب. أما من النص المفروض يطلع عليه شوكولاتة فادجي وسميكة. 10.إذا طلع العود نظيف تمامًا معناها خبزناها زيادة. بدنا نطلعها من الفرن وهي لسه بتبين شوي كأنها ناقصة خبز لأنها بتتماسك أكثر بعد ما تبرد 11.بنخليها تبرد بالصينية لمد ١٠ دقايق قبل ما نطلعها، بنقطعها لمربعات وبنقدمها والف صحة وعافية❤️