كيكة الجبنة والزعتر

اول اشي بنخلي البيض واللبن ياخدو درجة حرارة الغرفة بنحط اربع بيضات بدرجة حرارة الغرفة ، كوب حليب سائل يكون دافي ، معلقتين كبار لبن يكون بدرجة حرارة الغرفة ، وبنحط كوب زيت زيتون ( ممكن نحط نص الكوب زيت زيتون ونصه زيت نباتي عادي بصير بس زيت الزيتون ازكى ) بنخلطهم مع بعض لمدة دقيقتين لحتى يتغير لونهم . بنحضر المواد الجافه ، كوبين ونص - ثلاث أكواب طحين ، معلقة كبيرة زعتر عادي ، ثلث معالق صغار بكنج باودر ، معلقة صغيرة بكنج صودا ، كوب زعتر اخضر ، جبنة بيضا منقوعة او مغلية المهم تكون حلوة ومصفية . بنخلطهم مزبوط وبعدين بنصير ندير على الخليط السائل بالتدريج وبنحرك اول باول عشان ما يكبتل الطحين .. بنكرر هاي الخطوة لحتى يخلصو كل المواد الجافة وبنتأكد انه خلطناهم مزبوط بعدين بنحط بقالب مدهون بزيت زيتون او زيت نباتي او زي ما بدكم المهم ما يلزق بنحط نص الخليط وبعدين بنحط جبنة بيضا وبنرجع نزيد اللي ضل منه وبنزين الوجه بالزعتر والجبنة بنخبزها بالفرن من ٤٠ دقيقة لغاية ساعة، حسب قوة فرنكم قدموها مع كاسة شاي وصحتين وعافية